Charm

CHARM rannsóknin var fjölþjóðleg rannsókn sem gerð var á sjúklingum með hjartabilun. Henni lauk í mars árið 2003 og hafði hún þá staðið yfir í rúmlega 4 ár. Tilgangur rannsóknarinnar var að rannsaka hvort lyfið Atacand, sem inniheldur virka efnið candesartan, væri áhrifarík meðferð við hjartabilun og hvernig það myndi reynast samborið við lyfleysu.

Einnig var rannsakað hvort lífshorfur og líðan sjúklinga með hjartabilun batnaði með því að bæta candesartan við þá meðferð sem þeir voru þegar á. Jafnframt var rannsókninni ætlað að svara spurningum um hvort candesartan myndi draga úr heildartíðni á dauðsföllum, dauðsföllum af völdum hjartasjúkdóma og innlögnum á sjúkrahús af völdum hjartabilunar.

Í raun var um 3 rannsóknir að ræða þar sem hver og ein hafði sín sérstöku inntökuskilyrði.

• CHARM Alternative: Sjúklingar með skerta starfsemi vinstri slegils (depressed LV function) (EF=40%) sem ekki voru á meðferð með ACE-hemlum vegna óþols.
•  CHARM Added: Sjúklingar með skerta starfsemi vinstri slegils (EF=40%) sem voru á meðferð með ACE-hemlum.
•  CHARM Preserved: Sjúklingar með óskerta starfsemi vinstri slegils (preserved LV function) (EF>40%) sem voru annað hvort ekki á meðferð með ACE-hemlum, eða á meðferð með ACE-hemlum og þá að uppfylltum ákveðnum öðrum skilyrðum.

Heildarfjöldi sjúklinga í CHARM rannsókninni var 7.601 í 25 löndum. Þar af voru 82 hér á landi á 2 rannsóknarstöðvum, á Landspítala við Hringbraut og í Fossvogi.

Niðurstöður úr CHARM Alternative sýndu að hjá sjúklingum sem tóku candesartan minnkaði áhættan á dauða og hjarta- og æðasjúkdómum um 23%, samanborið við viðmiðunarhópinn. „Þrátt fyrir að þátttakendur í þessum hluta þyldu ekki ACE-hemla, þoldu þeir candesartan mjög vel og notkun þess dró úr hættu á hjarta- og æðasjúkdómum og dánartíðni“ sagði Christopher Granger, kynnir þessa hluta rannsóknarinnar.

Niðurstöður úr CHARM Added sýndu að hjá sjúklingum sem tóku candesartan sem viðbót við ACE-hemil, minnkaði hættan (relative risk) á dauða af völdum hjarta- og æðasjúkdóma um 15% og innlögnum vegna elnunar á hjartabilun fækkaði um 27%. „Candesartan var bót fyrir sjúklinga, hvort sem þeir tóku beta-blokkari eða ekki og hvort sem þeir tóku hámarksskammt af ACE-hemli eða ekki,“ sagði prófessor John McMurry sem kynnti þennan hluta rannsóknarinnar.

Niðurstöður CHARM Preserved sýndu að færri innlagnir vegna hjartabilunar voru í hópnum sem tók candesartan en ekki var sýnt fram á mun í dánartíðni. Salim Yusuf prófessor sagði um þennan hluta: „Þó svo að ekki hafi verið unnt að sýna fram á tölfræðilega marktækan mun í CHARM Preserved, útilokar það ekki möguleikana á að marktækur munur komi fram í stærri rannsókn.“

Niðurstöður úr rannsókninni í heild benda til að hugsanlegt sé að bæta candesartan við meðferð hjá öllum sjúklingum með króníska hjartabilun, burtséð frá kyni, aldri og útfallsbroti (EF). Samantekin greining á rannsóknunum þremur sýndi að candesartan minnkaði marktækar líkur á dauða vegna hjarta- og æðasjúkdóma. Rannsóknin gaf einnig vísbendingar um minni líkur á dauða af hvaða orsök sem er og nálgaðist það tölfræðilega marktækni (p=0,055). Áhugavert er að marktækt var sýnt fram á 22% færri tilfelli af nýgengni sykursýki. Árangur náðist þótt candesartan væri bætt á aðra meðferð sem fyrir var, þar með taldir ACE-hemlar og beta-blokkarar.
                                                                                               Til baka